اسلام آباد۔11جون(اے پی پی):وفاقی وزیر خزانہ و محصولات سینیٹر محمد اورنگزیب آکھیے جو جاری مالی سال اچ آئی ایم ایف، عالمی بینک اتے ایشیائی ترقیاتی بینک دے اندازیاں دے باوجود اقتصادی ترقی دی شرح 2.4 فیصد ودھی اے، قومی معیشت دا حجم 11 فیصد ودھارے دے بعد 375 ارب ڈالر تھی ڳئے، ملک چلاوݨ کیتے ٹیکس ضروری اے، فی کس آمدنی 129 ڈالر ودھارے دے بعد 1680 ڈالر تھی گئی اے، مہنگائی دی شرح 11.8 فیصد ریکارڈ کیتی گئی اے۔ جاری مالی سال24۔2023 دے اقتصادی سروے دے اجراء تے وزیر مملکت علی پرویز ملک، اکنامک ایڈوائزر ڈاکٹر امتیاز، سیکرٹری خزانہ امداد اﷲ بوسال اتے سیکرٹری منصوبہ بندی شہریار سلطان نال پریس بریفنگ اچ وزیر خزانہ سینیٹر محمد اورنگزیب آکھیے جو پچھلا مالی سال مکݨ تے جی ڈی پی دی شرح 0.2 فیصد ہئی، اوں ویلھے آئی ایم ایف کولو ونڄݨ توں علاوہ ٻئی کوئی راہ کائنا ہئی، ایں سانڳے بین الاقوامی مالیاتی فنڈ نال سٹینڈ بائے معاہدہ کیتے جو معیشت تکڑی تھیوے اتے معاشی اہداف پورے کریجن، صنعتی پیداوار اچ اوکھ رہے ٻھل زراعت، لائیوسٹاک اتے ڈیری دے شعبہ وݙی ترقی کیتی اے، مالیاتی سطح تے وی مثبت پیشرفت تھئی اے، ایف بی آر محصولات دی وصولی دی شرح 30 فیصد ودھی اے، صوبیاں کوں پرائمری سرپلس اچ چنڳے کردار تے کریڈٹ ݙیوݨا چاہیدے، حسابات جاریہ دا خسارہ 6 ارب ڈالر رہݨ دا امکان ہا ٻھل سال مکݨ تے اے 200 ملین ڈالر تئیں رہے جیڑھا حوصلہ افزا اے، ترسیلات زر اچ وی بہتری رہی اے، ملکی کرنسی اچ استحکام آئے۔ ایں ویلھے سٹیٹ بینک کولو 9 ارب ڈالر توں ودھ ذخائر ہین، مہانگ مرحلہو ار ڳھٹدا پئے، پچھلا سال مکݨ تے افراط زر دی شرح 38 فیصد ہئی ڄیڑھی 11.8 فیصد تے آگئی اے، بنیادی اتے خوراک دی مہنگائی اچ کمی تھئی اے، پالیسی ریٹ وی ڳھٹا ݙتے، توقع اے زری سہولت شروع تھیوݨ نال افراط زر اچ کمی آسی اتے معیشت تے مثبت اثرات پوسن۔ انہاں آکھیا جو حکومت اصلاحات کیتے سنجیدہ اے، جی ڈی پی دے تناسب نال ٹیکساں دی شرح ودھاوݨی اے، ٹیکس نظام اچ اصلاحات کرݨیاں ہوسن، توانائی و سرکاری ملکیتی کاروباری اداریاں کوں بہتر کرݨ ترجیح اے، پبلک پرائیویٹ پارٹنر شپ دے تحت سٹرٹیجک ایس او ایز کوں رکھیا ونڄ سڳدے، ایف بی آر اچ لیکجز بند کرݨیاں ہوسن، ٹریک اینڈ ٹریس نظام مؤثر ٻݨیڄے، ملکی معاملات کیتے ہر کہیں کوں کردار ادا کرݨا ہوسی، بجلی دے شعبہ اچ سالانہ 500 ارب روپے دی چوری دا تخمینہ اے، ڈسکوز دی نجکاری کیتی ویسی، زراعت اتے آئی ٹی دے شعبہ جات کوں قرض ݙیوݨ کیتے گورنر سٹیٹ بینک نال ڳالھ چلدی پئی اے، ایں سانڳے سارے صوبیاں نال صلاح کیتی ویسی۔ پاسکو دی ری سٹرکچرنگ کریسوں۔ وزیر مملکت برائے اقتصادی امور علی پرویز ملک معاشی استحکام سانڳے حکومتی اقدامات دا ݙسائے جو حکومت ہیݨے طبقات تے ٻھار نا سٹݨ تے توجہ ݙیندی پئی اے، معیشت کوں دستاویزی ٻݨایا ویسی، نان فائلرز کوں فائلرز ٻݨایا ویسی، ڈھانچہ جاتی فالٹ لائن درست کرݨی اے۔ وزیر خزانہ آکھیے جو وزیر اعظم دا دورہ چین کامیاب رہے جیندے اچ باہمی تجارت و سرمایہ کاری، سی پیک دی اڳونہی اچ وݙی پیش رفت تھئی اے، زرمبادلہ ذخائر دی صورتحال تسلی بخش اے، آندے مالی سال دیان ادائیگیاں دا کوئی مسئلہ کائنی، پاکستان چین دی کیپٹل مارکیٹس توں وی فیدہ چیسی اتے مالی سال 25۔2024ء اچ پانڈا بانڈ جاری کیتے ویسن۔ وزیر خزانہ آکھیا جو نویں مالی سال دے سالانہ ترقیاتی پروگرام اچ ٻہوں اہم منصوبے ہی شامل کیتے ویندے پن، فنڈز دے بغیر کوئی منصوبہ پی ایس ڈی پی اچ نا پاتا ویسی۔
.jpg)
.jpg)
